ARINBOX

KARGA MODU SEGURU ETA EFIZIENTEAN IGOTZEA PARKE EOLIKOETAN

Offshore edo itsas industria eolikoan, mota eta tamaina desberdinetako garabiak dituzten ontzi eta itsasontzi ugarik esku hartzen dute, osagaiak eta beste karga batzuk manipulatzea errazteko. Turbinak instalatzen diren bitartean, jack-up ontziek funtsezko eginkizuna betetzen dute: ozeanoaren erdian osagai nagusiak muntatzeko gaitasun handiko garabiak dituzten ontzi erraldoiak dira, tamaina eta pisu handienekoak. Edukiera mugatuagoa duten beste ontzi mota batzuek, instalazio-fasean ez ezik, operazio-, mantentze- eta desegite-fasean ere laguntzen dute itsas zabaleko eragiketetan, eta, petrolioaren eta gasaren industrian bezala, ontzi horietatik plataformetara (eta alderantziz) egiten den kargen manipulazioa gaitasun txikiagoko garabiekin egiten da; 2,5 eta 3 tona da ohikoena. Azkenik, zerbitzu-garabiak goian instalatuta daude, turbinetan bertan, eta horiek ere ez dira 5 tonatik gorakoak izaten.

Gaur egun, kargak transferitzeko, poltsa bereziak edo altxatze-kutxa oso astunak erabiltzen dira, eta horiek zaildu egiten dituzte industria mota horretako garraio-, jasotze- eta biltegiratze-eragiketak. Gainera, desabantaila gehigarri bat dute: ez dira ziurtatuta egoten altxatzeko bitarteko gisa erabiltzeko. Bestalde, onshore edo lehorreko industria eolikoan, palleta da kargak dorre eolikoak dauden lursaileraino garraiatzeko bitarteko erabiliena. Bertan, karga-poltsak edo kutxak erabiltzen dira —normalean astunak— erremintak eta beste osagai batzuk turbinara igotzeko. Onshore turbinetako garabien edukiera, gehienez, 1 eta 2 tona artekoa izaten da.

Sektore eolikoko enpresek adierazi dutenez, jarduera horiek erraztu egin behar dira, eta sistema arin eta erabilerraza bermatu, lehiakorra eta merkatu objektiboaren baldintzak betetzen dituena, bai alderdi tekniko-ekonomikoei dagokienez, bai segurtasunari, arintasunari eta manipulazio-denborari dagokienez. Kargen egungo sistema aldatzeak kostu handia dakarkie instalazioei. ARINBOX proiektua KIMUAk sustatzen du, alegia, kargak manipulatzen, jasotzen eta garraiatzen aitzindaria den enpresak, eta proiektu horretan IK INGENIERÍAk, bizi-zikloaren azterketan (BZA) aditua den enpresak, parte hartu du.