Metalgintza

COLOR

ZIRKUITU INPRIMATUAK PROZESATZEAN KOLOREEN ARABERA BEREIZTEA

ZIRKUITU INPRIMATUAREN TXARTELA (PCB) plaka bat da, zirkuitu bat osatzen duten elementuak eta horien arteko konexio elektrikoak kokatzeko erabiltzen dena. PCB gehienek hainbat metal estrategiko dituzte: metal preziatuak (urrea, zilarra, paladioa eta platinoa) eta oinarrizko metalak (nikela, kobrea, aluminioa, zinka, eztainua, beruna eta burdina). Tresna elektriko eta elektronikoen hondakinen (TEEH) deskontaminazioan zehar, zirkuitu inprimatuen plakak tonaka sortzen dira, eta lurralde nazionaletik kanpo bidaltzen dira beren kudeaketarako. Bestalde, EAEn burdinazkoak ez diren metal nagusien (aluminioa, kobrea, nikela, molibdenoa, kromoa, zinka eta eztainua) 472.000 tona baino gehiago kontsumitzen dira urtean, zeinak 1.420 milioi euroko balioa duen.

REYDESA, Grupo Otuako kidea, metal ferrikoak eta ez-ferrikoak berreskuratzen dituen enpresa liderra da, eta hondakin metalikoen tarte zabala kudeatzen du. COLOR gauzatzeko, INATEC Taldeko I+G unitatearen laguntza izan du. 2016az geroztik, kobrearen erauzketaprozesuak eta metal preziatuak bilatzeko hainbat ikerketa-proiektu egin ditu, material horientzako tratamendu-prozesu bat definitzeko asmotan, eta, duela gutxi, bereizketa optikoko teknologia eskuratu du beste prozesu batzuetan erabiltzeko, PCBen tratamenduari aplika daitekeena.

REYDESA
HELBURUAK
  • Sentsore optikoetan oinarritutako teknologia baten bideragarritasun teknikoa, ekonomikoa eta ingurumenekoa frogatzen duten proba industrialak egitea, PCBak prozesatzean ateratzen diren materialari aplikatuta bere prozesatu mekanikoan zehar, PCBetan jasotako metal estrategikoak balorizatzeko.
  • Lurralde nazionaletik kanpo kudeatutako PCB fluxua gutxitzea, EAEko metal estrategikoak berreskuratuz eta TEEHen balorizazio-emaitzak hobetuz.
  • Tratamendu tradizionaletan sortutako gas eta efluente arriskutsuak murriztea, ingurumenarekiko lagunkoiagoa den prozesu berri baten bidez.
  • Teknika berri hori PCBen egungo tratamenduarekin alderatzea.
EMAITZAK
  • Bereizketa-errendimendu baxua eman du tratamendu mekanikoan dentsitateen bidezko ohiko bereizketatratamendua teknologia berriaren bereizketarekin ordezkatzean. Materialaren parte diren partikulak koloredunak izateak ez du beti metala duela adierazten, eta, ondorioz, koloreagatik bereizitako frakzioetan ez da metalezko eduki bilatua kontzentratzea lortzen. Horrenbestez, kolorez bereizteko metodo sentsorizatu berria ez da teknikoki bideragarria birrindutako PCBetan dagoen metala kontzentratzeko.
  • Dentsitateen arabera bereizteko tratamenduaren ondoren teknologia berria jartzean lortutako kontzentratu metalikoaren kalitatea hobetu da: oraingoan bereizte-errendimendu ona lortu da, frakzio metalikoak kolore barietate gutxiago duelako eta, ondorioz, ondo bereiztea errazten duelako.
  • Tratatutako PCB tona bakoitzeko 159,7 kg CO2 baliokideren isuria aurreztu da, ohiko tratamendu mekanikoaren eskema erabiliz eta prozesuaren amaieran teknologia berria txertatuz, kontzentratu metaliko bereiziaren kalitatea hobetzeko.
  • Tratamendu pirometalurgikoari dagokionez, ingurumen-inpaktuaren balio agregatuen (Pt) % 19,3 hobetu da, ohiko tratamendu mekanikoa kontuan hartuz eta teknologia berria prozesuaren amaieran sartuz.
ONDORIOAK
  • Bereizitako metal kontzentratuan metal estrategikoen kontzentrazio baxua egoteak material metalikoa galtzen dela esan nahi du, eta material hori plastikozko piezen zati dela. Irtenbide posibleak gehiago birrintzea edo metala duten piezak detektatzeko eta bereizteko errendimendua hobetzeko gai den beste detektagailu mota bat sartzea dira.
  • Materialetan zikinkeria egoten denez, beharrezkoa bihur daiteke aldez aurretik garbitzea, zeinak ura kontsumitzen eta efluenteak sortzen dituen.
  • Teknologia berria kontzentratu metalikoaren kalitatea hobetzeko tratamendu mekanikoaren zatitzat hartzen da, baina ez dentsitateen araberako ohiko bereizketa tratamenduaren ordezkotzat.

INGURUMENEKOA

TEKNIKOA

EKONOMIKOA

KOMERTZIALA

MERKATUAN

KOLABORATZAILEAK