BIOFURFURAL
GALDAKETA-INDUSTRIARAKO ERRETXINETARAKO TOKIKO BIOMASA
Alkohol furfurilikoa monomero gisa erabiltzen da erretxina furanikoak sintetizatzeko, zeinak funtsezkoak baitira galdaketaren sektorean. Alkohol hori furfuralaren hidrogenazioaren bidez egiten da, eta hidrogenazio hori hondar-biomasatik sortzen da, batez ere arto-uztetatik edo azukre-kanaberaren ahotzetik. Gaur egun, Euskadin kontsumitzen den alkohol furfurilikoaren % 100 Txinatik egindako inportazioetatik dator. Hegoafrikan eta Kariben azukre-kanaberaren industriari lotutako ekoizleak badaude ere, ez dira ekonomikoki lehiakorrak. Horrek esan nahi du alkohola kontsumitzen duten enpresak Asiako merkatuaren oso mendekoak direla; merkatu nabarmen lurrunkorra da, eta uztaren urtarokotasunaren eta horiek erregai gisa duten erabileraren mende dago.
Proiektu honen erronka alkohol furfurilikotik abiatuta erretxina furanikoak ekoiztearen bideragarritasun teknikoa eta ekonomikoa argitzea da, Euskadin erabilgarri dauden biomasa-iturriak erabiliz: inausketaren edo basogintzako uzten hondarrak, edo papergintzako azpiproduktuak, batez ere. Inportazioekiko mendekotasuna murriztea eta jasangarritasuna eta tokiko ekonomia indartzea da helburua, eta, horretarako Euskadin jada eskuragarri dauden biomasa-baliabideak aprobetxatzea.
KOLABORATZAILEAK
BIOFURFURAL proiektuaren helburua da Euskadin biomasatik abiatuta alkohol furfurilikoa ekoizteko instalazio bat abian jartzearen bideragarritasuna aztertzea, bertako eta/edo inguruko baso-hondakinak balorizatzea eta alkohol furfurilikoa ekoiztea ahalbidetuko duena. Ingurumen-zaintza lehiakorraren ikuspegitik aztertzeko lehen urratsa da.
Alkohol furfurilikoaren merkatua nabarmen garatu da furano-erretxinen eskaera gero eta handiagoari esker eta matrize polimeriko termoegonkorreko konposatuen, zementuaren, itsasgarrien, galdaketa-estalduren eta -erretxinen formulazioari esker. Beraz, Europan eskaera etengabea eta handia dago, eta alkohol furfuriliko bertan ekoizteari esker, Euskadiko industria kimikoak eta beste sektore batzuek lehiakorragoa izan ahalko dute, REACH araudia, Europako Itun Berdeko estrategiak eta Produktu Kimikoen Estrategia Berria betez. Arriskuak murrizteko eta instalazioaren ahalmena dibertsifikatzeko, furfuralean oinarritutako beste konposatu batzuen ekoizpen potentziala aztertu da. Konposatu horiek errentagarriagoak izan daitezke, eta alkohol furfurilikoaren Asiako konpetentzia konpentsatu dezakete.
Literaturan egiaztatutako bideragarritasun teknikoa lehenengo transformazioan erabilitako landare-hondakinen izaeraren eta horiek erauzteko beharrezkoak diren prozesuen araberakoa da, bideragarritasun ekonomikoari eragin baitiezaiokete. Bideragarritasun tekniko eta ekonomikoaren aurretiazko emaitzak positiboak izan dira. Hurrengo urratsa Eusko Jaurlaritzaren bioekonomiako berrikuntza-proiektuen lerroari I+G+B proiektu bat eskatzea da.
Proiektu erronkari gisa, BIOFURFURAL proiektuari laguntza teknikoa eta ekonomikoa eman dio IHOBEk, EKOBERRIKUNTZA PROIEKTUEN FABRIKA ekimenaren esparruan.